Asteartea, 2015eko azaroak 3a.
Farmaziara xake taularen bila
Buruko arazoak
dituzten gaixoekin terapia gisa erabiltzen dute xakea Araban. Fernando Mosquera
psikiatraren hitzetan, «zapore oneko sendagai bat hartzearen pareko baliabidea»
da xakea.
Fernando
Mosquera, abuztuan, Gasteizen hitzaldi bat ematen. DAVID
AGUILAR / EFE.
Buruko arazoak eta mendekotasunak dauzkaten
gaixoek funtzio kognitiboak hobe ditzaten tresna gisa erabiltzen ari gara
xakea». 1992an iritsi zen Fernando Mosquera Gasteizera (Buenos Aires, 1960),
eta Arabako Buruko Osasun Sarean psikiatra lanetan dabil egun. «Xakean
jokatutakoa naiz, zale gisa». Eta zaletasun horri segika heldu zion
proiektuari. Meridan (Espainia) dauka oinarria azterketak. «Juan Antonio
Monteroren taldea 2010ean hasi zen xakea hainbat esparrutan txertatzen; gizarte
arazoak zeuzkatenekin, adinekoekin, espetxeratuekin... Baina arlo terapeutikora
mugatu gara gu».
«Xakea bera, izatez, ez da terapeutikoa», hasi du azalpena. «Baina tresna
baliagarria izan daitekeela ikusi dugu. Gauzak ulertzeko eta barneratzeko
zailtasuna izaten da buruko gaixotasun askoren ondorioa, eta berreskuratze lan
horretan oso onuragarria da xakea». Gaixoarentzat «bitarteko erakargarria eta
atsegina izatea», hori da xakearen sekretuetako bat. «Zapore oneko sendagai bat
hartzearen parekoa da». Buru argitasuna, estrategia, harmonia, oreka,
erabakimena... «Oso joko berezia da xakea, oso konplexua». Mosqueraren
hitzetan, «bulkadak kontrolatzea» ahalbidetzen du. «Eta gure alorrean oso zaila
da hori lortzea». Bulkadei eustea eta hausnartzea, hori eskatzen du xakeak
etengabe. «Zaila da futbol jokalari bat zelai erdian zer egin behar duen
hausnartzen irudikatzea; bulkaden gainetik hausnarketa goratzen duen diziplina
bakarrenetakoa da xakea».
Iaz
hasi zuten bidea
«Buruaren errendimendua hobetzea» da oinarrian dagoen erronka. 2014ko
maiatzetik azarora egin zuten lehen froga. «Eta oso emaitza onak lortu genituen
sekuentziazioan eta planifikazioan, kontzeptualizazioan eta abstrakzio
gaitasunean, eta buruko azkartasunean». Psikiatraren hitzetan, horrez gain
hobekuntza nabarmena izan zen «arreta selektiboaren alorrean, kontzentrazioan,
elkartasunean, inpultsuen kontrolean, kohesioan...».
2015eko otsailetik uztailera egin zuten bigarren froga, eta hirugarrenarekin
lanean ari dira orain. «Tratamenduaren aurreko eta ondorengo azterketa
neuropsikologikoa egiten zaio gaixoari». 30 eta 69 urte arteko 22 pertsonarekin
egin zuten lehen froga, 2014an. «Hamasei gizonezkok eta sei emakumezkok. Denak
ziren droga kontsumitzaileak eta buruko arazoak zeuzkatenak». Bi irakasle, bi
psikologo eta psikiatra bat aritu ziren lanean.
Sendagai magikorik ez dago. «Eta xakea ere ez da». Baina Mosqueraren hitzetan,
inolako kalterik ez du eragiten gaixoarengan. «Tira, obsesioa, agian».
Etekinak, berriz, «oso nabarmenak» dira. Oinez hasi berritan dago proiektua.
«Eta pixkanaka zabalduz joatea da erronka; Araban, lehenengo, eta gainerako
probintzietan gero».
“Bulkaden gainetik hausnarketa goratzen
duen diziplina da xakea, eta hori oso baliagarria da terapia lanerako”
http://www.berria.eus/paperekoa/2138/023/002/2015-11-03/farmaziara_xake_taularen_bila.htm